Հայաստանի Հանրապետության ֆինանսական հետախուզության մարմինը ՀՀ կենտրոնական բանկի Ֆինանսական դիտարկումների կենտրոնն է:

ՖՀՄ-երի ստեղծման իրավական հիմքերը, հիմնական գործառույթները և գործունեության սկզբունքները սահմանվում են հետևյալ միջազգային փաստաթղթերով. • Անդրազգային կազմակերպված հանցավորության դեմ ՄԱԿ-ի 2000թ. Կոնվենցիա (Պալերմոյի կոնվենցիա), • Կոռուպցիայի դեմ պայքարի ՄԱԿ-ի 2003թ. կոնվենցիա, • Հանցավոր ճանապարհով ստացված եկամուտների լվացման, հետախուզման, առգրավման ու բռնագրավման և ահաբեկչության ֆինանսավորման դեմ պայքարի մասին Եվրոպայի խորհրդի 2005թ. Կոնվենցիա (Վարշավայի կոնվենցիա), • ՖԱԹՖ-ի 40 Հանձնարարականներ, • Էգմոնտ խմբի փաստաթղթեր:

ՖԴԿ-ի՝ որպես ֆինանսական հետախուզության մարմնի հիմնական գործառույթներն են տեղեկատվության ստացումը, վերլուծությունը և վերլուծության արդյունքների տրամադրումը ինչպես ներպետական, այնպես էլ միջպետական մակարդակով:

ՓԼ/ԱՖ դեմ պայքարի մասին ՀՀ օրենքով սահմանված իրավական ակտերը, այդ թվում` իրավական ակտերի կիրառության ընթացակարգերը պարզաբանող ուղեցույցներն ընդունվում են ՀՀ կենտրոնական բանկի խորհրդի և ՀՀ կենտրոնական բանկի նախագահի կողմից:

ՓԼ/ԱՖ դեմ պայքարի մասին ՀՀ օրենքով և Վարչական իրավախախտումների վերաբերյալ ՀՀ օրենսգրքով սահմանված պատասխանատվության միջոցները վերահսկող մարմին չունեցող հաշվետվություն տրամադրող անձանց նկատմամբ կիրառվում են ՀՀ կենտրոնական բանկի խորհրդի կողմից: